KURA YANGU NI CHACHU YA MAENDELEO!!!

Hii picha nilipiga mwezi wa 12 mwaka jana, mara baada ya kutekeleza Haki na wajibu

Wangu, mimi mtanzania kwenye uchaguzi wa serikali za mitaa uliofanyika mwezi wa 12 mwaka jana. Watanzania wengi tumekua na tabia ya kulaumu tu kuwa viongozi waliopo madarakani hawatimizi wanayopaswa kuyafanya kama viongozi na wawakilishi wetu, lakini ukija kuangalia kwa kiasi kikubwa Watanzania tulio wengi hatushiriki katika kuwachagua viongozi ambao tunawalalamikia, huwenda kwa kutokujua au tu kupuuzia na matokeo yake  masuala mbalimbali ya kimaendeleo yamekua yakichelewa wakati mwengine kutokufanyika kabisa, na wakati mwengine madhara makubwa kutokea kwenye jamii yetu kutokana ba viongozi na watendaji wazembe waliopo.

Kura yangu inanafasi kubwa sana ya kubadilisha mambo mbalimbali yanayoizinguka jamii yangu, iwapo tutajijengea utamaduni wa kupiga kura, kwa kiasi kikubwa kuliko ilivyo sasa basi matatizo mengi yaliyopo katika jamii kwa sasa yatatatulika kwasababu njia pekee ya kumuwajibisha mtu asiyetenda au kutimiza wajibu wake kiurahisi ni kwa kupitia sanduku la kura.

Sanduku hili litakuwa muamuzi wa kiutendaji wa watu tunaowapa dhamana ya kuwa wawakilishi wetu sehemu mbalimbali, na kwa namna hiyo viongozi wengi wataanza kuwajibika kwasababu sanduku la kura litakuwa linahusika kila baada ya awamu kuisha, kupima masuala yao ya kiutendaji, ikiwa ni pamoja na kwenda kinyume na vitu walivyoahidi au ambavyo walishindwa kutekeleza kabisa.

Wakati umefika sasa kwa wanawake kujua thamani ya kura zetu badala ya kuwapigia watu kura kwasababu ya kitu cha siku moja ambacho kitakuacha muda mrefu kuumia kutokana na utendaji wao mbovu, chagua mtu si kwasababu anakupa kitu, chagua mtu kwasababu anauwezo na vigezo vya kutimiza malengo ya sehemu ulipo, nchi uliyopo na mwenye uwezo wa kutatua changamoto tulizonazo.

Kuelekea uchaguzi mkuu, ifanye kura yako/yangu iwe chachu ya maendeleo yetu.